Deuteronomy 28

Izibusiso Zokulalela

1Uba limlalela ngokupheleleyo uJehova uNkulunkulu wenu njalo lilandele yonke imilayo yakhe engilitshela yona lamuhla ngonanzelelo, uJehova uNkulunkulu wenu uzaliphakamisa ngaphezu kwezizwe zonke emhlabeni. 2Lezizibusiso zonke zizakwehlela phezu kwenu zibe ngezenu nxa limlalela uJehova uNkulunkulu wenu.

3Lizabusiswa edolobheni libusiswe futhi lemaphandleni.

4Inzalo yenu izabusiswa, lezithelo zomhlabathi wenu kanye lenzalo yezifuyo zenu – amathole emihlambi yenu kanye lamazinyane emihlambi yenu.

5Kuzabusiswa isitsha senu kanye lomganu wenu wokuxovela izinkwa.

6Uzabusiswa nxa ungena ubusiswe lanxa uphuma.

7UJehova uzakwenza ukuthi izitha zakho ezikuvukelayo zinqotshwe phambi kwakho. Zizakuzalihlasela zivelela endleleni eyodwa, kodwa zizabaleka ngezindlela eziyisikhombisa.

8INkosi izakwehlisela isibusiso phezu kweziphala zenu, lakukho konke elizakwenza. UJehova uNkulunkulu wenu uzalibusisa elizweni lelo alinika lona.

9UJehova uzalimisa njengabantu bakhe abangcwele, njengokulithembisa kwakhe ngesifungo, nxa lingagcina imilayo kaJehova uNkulunkulu wenu lihambe ngezindlela zakhe.

10Ngalokho bonke abantu emhlabeni bazabona ukuthi lina libizwa ngebizo likaJehova, balesabe. 11UJehova uzalenza liphumelele kakhulu – kunzalo yenu, lenzalo yezifuyo zenu kanye lezithelo zomhlabathi wenu – elizweni afunga ngalo kubokhokho benu ukuthi uzalinika lona.

12UJehova uzavula amazulu, isiphala sakhe esiphuphumayo, ukuze anise izulu phezu kwelizwe lenu ngesikhathi salo njalo abusise yonke imisebenzi eliyenzayo. Lizakweboleka izizwe ezinengi kodwa lina lingeboleki lutho kuzo. 13UJehova uzalenza libe yinhloko, hatshi umsila. Nxa lizalalelisa imilayo kaJehova uNkulunkulu wenu engilinika yona lamuhla njalo liyilandele ngonanzelelo, lizahlala njalo liphezulu, lingabi ngaphansi lanini.

14Lingaphambuki loba lakuwuphi wemilayo engilinika yona lamuhla, lingaphambukeli kwesokunene loba kwesenxele, lilandela abanye onkulunkulu lokubakhonza.

Iziqalekiso zokungalaleli

15Kodwa-ke, uba lingayikumlalela uJehova uNkulunkulu wenu futhi lingalandeli yonke imilayo yakhe ngonanzelelo kanye lezimiso zakhe engilinika zona lamuhla, zonke leziziqalekiso zizakuba phezu kwenu zilehlele:

16Lizaqalekiswa edolobheni, liqalekiswe futhi emaphandleni.

17Isitsha senu kanye lomganu wenu wokuxovela izinkwa kuzaqalekiswa.

18Inzalo yenu izaqalekiswa, lezithelo zomhlabathi wenu, lamathole emihlambi yenu kanye lamazinyane emihlambi yenu.

19Lizaqalekiswa ekungeneni kwenu futhi lizaqalekiswa lasekuphumeni kwenu.

20UJehova uzakwehlisela phezu kwenu iziqalekiso, ukuphambana kanye lezithuko emisebenzini yenu yonke eliyenzayo, lize libhujiswe njalo lichithwe ngenxa yobubi elibenzileyo ngokumdela. 21UJehova uzalehlisela isifo lemikhuhlane ize ilibhubhise iliqede elizweni elingena kulo ukuba libe ngelenu. 22UJehova uzalitshaya ngomkhuhlane olidla kancane kancane, ukutshisa komzimba lokuvuvuka komzimba, lokutshisa kwelanga lendlala, ngokuhanguka langesikhwekhwe, okuzakuba yisifo esizakwehlela phezu kwenu siliqede. 23Isibhakabhaka ngaphezu kwenu sizakuba lithusi, kuthi umhlabathi ngaphansi kwenu ube yinsimbi. 24UJehova uzaguqula izulu elina elizweni lenu kube zintuli lothuli, kuzakwehla kuvela esibhakabhakeni lize libhujiswe.

25UJehova uzavumela ukuthi izitha zenu zilehlule. Lizakuya kuzo lihamba ngendlela eyodwa kodwa lizabaleka ngendlela eziyisikhombisa, futhi lizakuba yinto eyenyanyekayo kuyo yonke imibuso yasemhlabeni. 26Izidumbu zenu zizakuba yikudla kwezinyoni zonke zasemoyeni, kanye lezinyamazana zasemhlabeni, njalo azilakwethuswa muntu.

27UJehova uzalitshaya ngamathumba aseGibhithe langesifo sokuvuvuka, izilonda ezibhibhidlayo lamaqhubu alumayo, okungelaphekiyo. 28UJehova uzalehlisela umkhuhlane wokuphambana kwengqondo, ubuphofu lowokudungeka kwengqondo.

29Lizaphumputha loba kusemini njengesiphofu emnyameni. Aliyikuphumelela kukho konke elikwenzayo; lizaphangwa njalo licindezelwe insuku ngensuku, kungekho muntu ongalihlenga.

30Uzathembisana lowesifazana ukuba lithathane, kodwa kuthi enye indoda imthathe ilale laye. Uzakwakha indlu, kodwa kawusoze uhlale kuyo. Uzahlanyela isivini, kodwa kawusoze ukholise izithelo zaso. 31Inkabi yakho izahlatshwa phambi kwakho, kodwa kawusoze uyidle. Uzathathelwa ubabhemi wakho ngenkani kodwa angabuyiselwa kuwe. Izimvu zakho zizanikwa izitha zakho, kodwa kakho ozakuzihlenga. 32Amadodana akho kanye lamadodakazi akho azanikwa esinye isizwe, njalo amehlo akho azafiphala ngokuwalindela izinsuku zonke, ungelamandla okuphakamisa isandla.

33Abantu ongabaziyo bazakudla izithelo zomhlabathi kanye lomsebenzi wezandla zakho, akulalutho ozaluzuza ngaphandle kokucindezelwa ngesihluku izinsuku zakho zonke. 34Izinto ozibonayo zizakwenza uphambane ingqondo. 35UJehova uzakutshaya amadolo akho lemilenze yakho ngamathumba abuhlungu njalo angelaphekiyo, amemetheke esuka ngaphansi kwezinyawo zakho kuze kuyefika ekhanda.

36UJehova uzalinikela esizweni elingasaziyo lina kumbe okhokho benu lina kanye lenkosi yenu elayibekayo ukuthi ilibuse. Khonale lizakhonza abanye onkulunkulu, onkulunkulu abenziwe ngezigodo langamatshe. 37Lizakuba yinto eyenyanyekayo lento yokuchothozwa lokweyiswa kuzo zonke izizwe lapho uJehova azalixotshela khona.

38Lizahlanyela inhlanyelo enengi emasimini enu kodwa lizavuna okuyingcosana, ngoba izikhongwane zizabhuqa amabele enu.

39Lizahlanyela izivini njalo lizihlakulele kodwa kaliyikunatha iwayini loba ukukha izithelo zazo, ngoba zizadliwa yimihogoyi.

40Lizakuba lezihlahla zama-oliva zigcwele ilizwe lenu lonke kodwa kaliyikuwasebenzisa amafutha azo, ngoba izithelo zama-oliva zizakhithikela phansi. 41Lizakuba lamadodana kanye lamadodakazi kodwa kaliyikubondla, ngoba bazathunjwa. 42Isikhongwane sizabhuqa zonke izihlahla zenu kanye lamabele elizwe lenu.

43Owezizwe ohlala phakathi kwenu uzaphakama phezu kwenu njalonjalo, kodwa lina lehlele phansi njalonjalo. 44Yena uzaleboleka, kodwa lina kaliyikumeboleka lutho. Yena uzakuba yinhloko, lina libe ngumsila.

45Iziqalekiso zonke lezi zizalehlela. Zizalilandelela zilihlasele lize libhubhe, ngoba lingamlalelanga uJehova uNkulunkulu wenu langagcini imilayo yakhe kanye lezimiso zakhe alinika zona. 46Lizakuba yisibonakaliso lesimangaliso phezu kwenu laphezu kwezizukulwane zenu kuze kube nini nini.

47Ngokuba alizange limkhonze uJehova uNkulunkulu wenu ngentokozo langenjabulo ngesikhathi senu sempumelelo, 48ngakho lizasebenzela izitha uJehova azalithumela zona lina lilambile njalo lomile, lihambaze ebuyangeni obukhulu. UJehova uzafaka ijogwe lensimbi ezintanyeni zenu aze alibhubhise.

49UJehova uzaletha isizwe esizamelana lani esivela kude, emikhawulweni yomhlaba, njengengqungqulu ehwithayo, isizwe esikhuluma ulimi elingaluzwayo, 50isizwe sabantu abesabekayo abangahloniphi abantu abadala loba ukuba lozwelo kwabancinyane.

51Bazakudla inzalo yezifuyo zenu kanye lamabele elizwe lenu lize libhujiswe. Kabayikulitshiyela amabele, iwayini loba amafutha, kumbe amathole ezinkomo zenu kumbe amazinyane emihlambini yenu lize lichithwe. 52Bazalivimbezela emadolobheni enu wonke aselizweni lenu kuze kuwe imiduli yawo eqinileyo emide njalo eliyithembileyo. Bazavimbezela amadolobho enu wonke aselizweni lelo uJehova uNkulunkulu wenu alinika lona.

53Ngenxa yokuhlupheka kwenu okuzabangelwa yikuvinjelwa kwenu yizitha zenu, lizakudla inzalo yenu, inyama yamadodana kanye lamadodakazi iNkosi uNkulunkulu wenu alinike wona. 54Loba indoda ethobekileyo kakhulu lelozwelo phakathi kwenu ayiyikuba lesihawu kumfowabo kumbe umfazi wayo emthandayo loba abantwana bayo abasaphilayo, 55kayiyikupha loba ngubani wabo inyama yabantwabayo eyabe iyidla. Kuzakube kuyikho kodwa okuseleyo ngenxa yokuhlupheka okwehliselwe phezu kwenu yizitha zenu ngesikhathi zilivimbezele emadolobheni enu wonke.

56Owesifazana obuthakathaka njalo olozwelo phakathi kwenu – olozwelo njalo obuthakathaka okokuthi angeke athinte umhlabathi ngenyawo zakhe – uzakuba lolaka endodeni yakhe ayithandayo lasendodaneni lendodakazini yakhe 57inzalo yethumbu lakhe abantwana abazeleyo. Ngoba usehlose ukubadla ensitha ngesikhathi sokuvinjezelwa lokuhlupheka isitha senu esizalehlisela khona phezu kwenu emadolobheni enu.

58Lingayekela ukulandela ngonanzelelo wonke amazwi alo umthetho, alotshwe kule incwadi, njalo lingalesabi lelibizo lenkazimulo eyesabekayo – uJehova uNkulunkulu wenu –

59uJehova uzakwehlisela phezu kwenu kanye lezizukulwane zenu izifo ezesabekayo, izinhlupheko ezimangalisayo ezizathatha isikhathi eside, lemikhuhlane enzima engapheliyo. 60Uzakwehlisela phezu kwenu imikhuhlane yonke yaseGibhithe elaliyesaba, inamathele phezu kwenu. 61UJehova uzakwehlisela futhi phezu kwenu izinhlobo zonke zemikhuhlane phezu kwenu kanye lezinhlupheko ezimangalisayo ezingalotshwanga kule iNcwadi yomthetho, lize libhujiswe. 62Lina elalibanengi njengezinkanyezi zasemkhathini lizasala selibalutshwana, ngoba kalilalelanga uJehova uNkulunkulu wenu. 63Njengalokho kwamthokozisa uJehova ukuba aliphumelelise njalo alengezelele inani lenu, ngokufanayo kuzamthokozisa ukulichitha njalo alibhubhise. Lizasuswa elizweni lelo eselilungele ukungena kulo ukuthi lilithathe.

64UJehova uzalihlakazela ezizweni zonke, kusukela komunye umkhawulo womhlaba kuze kuyefika komunye njalo. Khonale lizakhonza abanye onkulunkulu – onkulunkulu abenziwe ngezigodo labenziwe ngamatshe, elingazange libazi lina kumbe okhokho benu. 65Phakathi kwalezozizwe kaliyikufumana ukuphumula, kumbe indawo yokuphumuza izinyawo zenu. Khonapho uJehova uzalipha ingqondo ekhathazekileyo lamehlo akhatheleyo ngokufisa, kanye lenhliziyo ethuthumelayo.

66Lizahlalela evalweni izikhathi zonke, ligcwele ukwesaba emini lebusuku, lingelaqiniso lempilo yenu.

67Ekuseni lizakuthi, “Aluba sekuntambama!” ntambama lithi, “Ngabe kusekuseni! – ngenxa yokwesaba okuzakwehlela izinhliziyo zenu lengxenye yezinto elizazibona ngamehlo enu.

68UJehova uzalithumela futhi eGibhithe ngemikhumbi uhambo engathi aliyikuluhamba futhi. Lapho lizazithengisa ezitheni njengezigqili zesilisa lezesifazana, kodwa kakho ozalithenga.